الليله رح اكتب تقرير
واعمل متل البعثيي
بدي أبعت تاني مكتوب
لرئيس الجمهوريه
الحكي بسرّك يا دكتور
المواطن عايش مقهور
المحافظ عنا عرعور
وحواليه حخزمتجيه
عنّا بالساحل حيتان
وعم تحكمنا حراميه
بـ طرطوس كم ديّوس
ومتلن باللاذقيه
وخايف طالب بالإصلاح
يحطوني لإصلاحيه
ويقولو عني مندس
ومن الأسره الوهابيه
شبيحه وقدّن زعران
عنّا بكل مديريه
ورشاوي وحسوبيات
ونسوان عا شكل هديه
جقلان بقلب الإسكان
والمواصلات واويه
وإذ بتزور البلديات
بتشوف كلاب جعاريه
الداخل عا المشفى مفقود
والطالع منّو مولود
فساد ما الو حدود
بالمشافي الوطنيه
أكتر شي قلبي مقهور
من طمع شرطي المرور
بيقبض اكتر من دكتور
اللي اختصاصو قلبيه
ومحطة المحروقات
صار اسما محطة مسروقات
ملايين من التهريبات
وحصه للداخليه
بالساحل كلشي محسوب
وبتشوف المحسوبيات
كلّو ماشي بالمقلوب
وفيه أيادي خفيّه
واللي عا الجبهه ما يحارب
معاشو رايح ضرايب
وما فيه مين يحاسب
من السلطه القضائيه
تجار الأزمه عنّا
صارو حيتان
والعقّال بساحلنا
صار بدهن عصفوريه
٢/١٨ عماد فجر بعريني
