صرخه من زوجة شهيد
رح خبّرك ببلادنا
كيف مات زهر الياسمين
وأيتام عم تسقي الأمل بدموع الحنين
رح خبرك كيف أنسرق حلم الطفوله
من عيون العاشقين
كفكفي دموع الحزن
وتمردي عا الظلم يا لين
وصرخة بطل ودّع ولادو بعتمة كوانين
ترك الوديعه امل مع حرمان
مع أطفال بعمر الرياحين
صوت الطفوله بالنحيب
ما أصعبو ياليل
لمّا حنين الدم بتشوفو قهر
بعيون اليانور وجويل
وسيف عم يدبح من الجنبين
قالو شهيد قالو اسير
ومعو الآلاف بالتوبه سجين
لا خبر من حيدر إجا
من بعد خمس سنين
رايات معجونه بدم الشباب
ما بترفعا حكومة ساقطين
ومُخبر وضيع عا المقصله
و ساطور عم يدبح بأسم الدين
الارهاب مو بس الدبح بالسكين
الأرهاب لمّا تشوف أرمله
تركا حبيبا وراح واستشهد
وعم تسبيها القوانين
ورقص مو فرح
جايي من الدبح بين الثعابين
قومي أُخيا تمردي وثوري
واضربي بنعلك يلي كلّو طهر
كل النياشين
وأطلقي صرخه بوجه كل ّالبشر
ربّ البشر عا الظالمين
١/١ /٢٠١٩ عماد فجر بعريني
