الله يساعد الله يعين
اللي بقيو من السوريين
أزمه عم تلحق أزمه
وتقنين ضمن التقنين
من سنين ما شفنا الكاز
وهلق عنّا ازمة غاز
وكلا الغاز بألغاز
وساعه مازوت وبنزين
ساعه بتجنّ الأسعار
بالفواكه والخضار
صار عم يحكمنا التجار
ترحمّنا عا الإرهابيين
لا رقابه ولا تفتيش
وما عدنا شفنا التموين
وإذ بتقول كيف بدنا نعيش
جنب اسمك بيصير فيش
وبيطلعلك مسؤول كديش
بيقول عنّا مندسيّن
احترنا بين داعش والبعث
بتموت دبح ولاّ دعس
منهم الله ينجينا
الهيئه علينا متفقين
بيقولو تحدينا الغرب
وساعه بيحكو بحالة حرب
الحقيقه نجحو بالكذب
وصرتو هلق مكشوفين
ساعه بيضربنا الأتراك
ساعه بيقصفنا باراك
ساعه وريث مبارك
بيتهجّم عا السوريين
نحليّنا وما لاقو حل ّ
وصرلا الأزمه من السبعين
وإن قالو الحلّ بإيران
بيزعل بو علي بوتين
وإذ قالو بيحلّا الروس
بيزعلو الإيرانيين
وبيرجع جيش الإسلام
وبيبلش ضرب السارين
٢/١٣ عماد فجر بعريني
