Roj-Helbest
yekdilî
Gwîzanên manê
Hedara min diqelêşin
Metirsiyên biyaniyê
Xewna min dikevêjin
Li çavên te vedigerim
Kenê heyvê
Çirûsk û roniya peyvê.
1/26 / 18.z.
********************
Rûxandin
Demsalên rûxandinê
Li yek hawî kar dibin
Pêl şepêl
li me tarûmar dibin
lavedar û rêbiwar
li me dîn û har dibûn…
siwarê hespê perdar
stêr bo me nanîne xwar…
tarî me diçirizîne
mizgîn naçirisîne
Hemî çav tolaz û pûştin
helbestên min
xwe di tava heyvê raneşûştin.
12/21 / 201z
************************
NIJDE
şev e…
nijde bi rê dikeve
wawîk ji kunê direve
di tûnêlan re dibûrin
Mest û gêj
Dêris Dibin
hemî lavêj û nimêj…
min wêneyê Ahrîman
siwar didît
li ser pişta ker ê,
pixember
Axirzeman !!.
16.12.2008
****************
Pirsa Mindal
Çemê xwînê
bi himhim û nalenal e
çêj û xwîzîya jiyanê
di gewrîyan de tal e…
pirsa mindal
di pencera sosretê de
ne hatiye tevizandin
Da, iş çi bablîsok e?!
Ji hêrza pişkandina çi "yezdanî"
Hatîye aferandin?!.
Ji tirsa çi şapatê
hatîye raperandin?!.
18.12.2008 .z
****************
