يعيش يعيش
إذ حبيت تشوف الفقر
أطلع عا ضيع دريكيش
من الدوله بتشوف العهر
فقر وحرمان وتهميش
تسعين بالميّه من الناس
ما فيها تشتري مداس
وعندك عشره بالميه
حرامي ومُرتشي وعفّيش
البيت ال فيه خمس معاشات
اكلن زيتون وقريش
الناس عم تكفر بالعبري
ودروشها يا بو الدراويش
واللي من السرقه جمّع مال
صار عنّا رجل أعمال
بضيعتنا في هيك اندال
وبكل ضيعه فيه كديش
مدعوم من البعثيين
ومشايخنا الواطين
ومن لمّا اللي حكيت الحقّ
بلشو تحريض وتجييش
القصه من قبل السبعين
اجيال عاشو مرهونين
لمشروع الواطيين
هيك بدّو بنيامين
وهتفو يعيش يعيش
٥/٢٤
عماد فجر بعريني
______________
جاري ابن النايحه
يوميّه بيشكي وبينوح
عقلو من العصر الحجري
وعايش بعدو بزمن نوح
بيّو كان يمشي حفيان
عا الحواش وجبل شلوح
من شي اربع خمس سنين
سكن بحارة بيت مسوّح
جاري بيملك مليارات
وأموال بالخمس قارات
ومعو اربع جنسيات
ويوميّه بيشكي وبينوح
بياكل بيضه مقليه
وعمرو ما داق الليي
عايش عا العشبه البريّه
قرّه ودردار وقيلوح
وما بتطلع منّو الليره
لو شاف ابنو مدبوح
جاري الف اسم لله عليه
اذ بتشوفو بتبكي عليه
مليارات وسيارات
وعايش عيشة سنكوح
جاري بيحبّ العمله
إن مكنو بيحلب القمله
مو قصدي شنّ حمله
قلبي من المتلو مجروح
وماني مطوّل بالحاره
كلّا كم يوم ورح روح
٥/٢٣
عماد فجر بعريني
_________________
من أركان الإيمان
يكون اصلك من بيت فلان
من اركان الإيمان
تكون عرصا وتلحق نسوان
وتصفّق لفلان
وتحكي بأسم فلان
وبيك موالي للبعث
وأمك مع حزب الأخوان
من اركان الإيمان
تقول نحنا الصحّ
وتكفّر باقي الأديان
ويكون ما عندك أخلاق
ولا فيك تعيش بوجدان
وتعيش بكوخ وتمسح جوخ
ويوميه تلحوس سيقان
وها القصه ما بّدا كتير
دقن ولفّه ومزويّه
وتحفظ كم ايه من القرآن
رح تمشي خلفك ضيعتنا
ونصّ دوير رسلان
ولحكومه تعلّق لك نيشان
لا تخاف من كلماتي
اكتر العالم عميان
٥/٢٢
عماد فجر بعريني
___________________
يا جاي من الغربه
ورايحه تغريب
نور الشمس عا جبينك
مضوّى الدني
وعا نحرك صليب
عرفتك انا من حزن عينيكي
من ريحة الطيب
قلبي انكسر من يوم
ما تركتي الوطن والجرح
عا البعد ما عد يعرف يطيب
رح خبرك عن حلم شفتو رهيب
متلك غريب بها الوطن
شو بينفع طبيب
علينا الزمن جار
موت ودمار ونار
والشمس طلعت عا اصفرار
وبلشو بها الوطن تخريب
وصارت بلدنا محرقه
من الدير لا عفرين لا الرقّه
وما بين حلب والشام
نصبو خيام وصلت لمعبر نصيب
ومتراس مع قناص
وطرقات مقطوعه بدواليب
يا جاي من غربتك
جايي بآخر ها الزمان
ياما بعتت مرسال ومكاتيب
قبل ما تفنى الدني
ويغتالو العندليب
٥/٢١
عماد فجر بعريني
________________
عنّا شيخ بضيعتنا
عندو خلطه عجيبه
ويوميّه من الصبحيات
بيكتب عشرين كتيبه
فيها يحلل ويحرّم
وكان ينط عا ديبي
كتيبه تحميك من العين
وكتيبه تشيل المصيبه
يوميه عندو زوار
بيشفي من زنّار النار
بيّو وجدّو صارو مزار
وبيتو بيشبه لزريبه
وفيه ناس قالو بيشفي
وبيحاكي الله بالمخفي
وبيشفي من الشلل النصفي
وللسيدا عندو تركيبه
وقالو كان يحاكي الجان
وبأيدو خاتم سليمان
منّو كتير حبلو نسوان
ولادو بعدد كَتيبه
والناس تقدّ س روحو
صابتني دهشه وريبه
ويوميه بسأل حالي
مين ركّب ها التركيبه
فيقو وانتبهو يا ناس
من بطيحان ومن جساس
مافي شي اسمو مقدّس
تجار الدين مصيبه
٥/٢٠
عماد فجر بعريني
_______________
بكرا رح زور الرءيس.
وبيني وبينو رح قلّو
بدي بلّش ب خميس.
وعليهن كلّن رح دلّو
كلّ المسؤولين لصوص
وعن الاخلاق تخلو
والشبيحه والتجار
بلدنا كلّا احتلو
ولحكومه والإدارات
ومجلس الشعب كلّو
الجمعيات والنقابات
وكلّو عم ينهب كلّو
والشرطه والبلديات
الهن صاحب ما خلّو
والقضاء عنا غاب
والقاضي تاجر رح قلّو
العالم صارت بالويلات
ويا ريت عنّا يفلّو
واللي مفكّر يحكي الحقّ
الامن عليه بيدّلو
والبعثيي متل العاده
عن الكذب ما ملّو
ولاد الشهدا والجرحى
يوميّه عم ينذلّو
ونصّ السوريي جوعان
غير اللي تركو وفلّو
٥/١٩
عماد فجر بعريني
_________________
أنصبو ليَ المشنقه
واوقدو لجسدي المحرقه
واودعوني في الغياهب
عشرون عام وقيّدو معصمي
فما زالت يداي
تحتضنُ المنجل والمطرقه
انصبو لي َ المشنقه
أستدعو الأحتياط
والآف الظبّاط
من بغداد الى الرباط
وكل ابناء الزندقه
رايتي حمراءوحبيبتي سمراء
أنا صرخة ُ الفقراء
فحاصروني
واكيلو التهم المسبقه
فمن جرحي َ النازف
رسمتُ أحلامي
وكلماتي باتت مُعَلقه
فأنا أبا ذرّ الغفاري
ونسبي غيڤاري
وشمسي على الكون مشرقه
فما نفعُ المحرقه
وانا سيد الرجال
عشقتُ الغِلال
لن تهنىء عيشتي
قبلَ قطعُ اليد ِ السارقه
انصبو لي َ المشنقه
٥/١٨
عماد فجر بعريني
