قولي شو بدك قولي
ولا تقوليلي مشغوله
الليله بدنا نشرب كاس
وفتوش جنبو تبوله
البقدونس من سهل الغاب
والبرغل من سهل الحوله
وبندوره درعاويه
وبطاطا معرّاويّه
وزيت الزيتون من عفرين
ومن إدلب جبنه مجدوله
وسمكه حرّه من طرطوس
وجرجير من ضيع القدموس
الليله بدّي أتحدى الروس
ورح انزل بأسطولي
وبدّي أعملكّ فتوش
البقله جيبا من دركوش
ومن حلب اكلة كروش
أنتي الليله بمنزولي
وبدي حطلّك دراق
من مشقيتا وعين شقاق
وفستق شغل المعره
ومن ضيعتنا هبّوله
ورح اعمل مقلي فخار
ونقعد جنبو حدّ النار
وبلّش أنظملك أشعار
وقولي شو بدك قولي
وبدي رقصه شرقيه
تقهر كل البعثيي
وأتحدى الاخونجيّه
على صوت الزغلولي
وأعزم الماركسيي
وصحابي من القوميي
وندبك دبكه سوريه
ميجانا ودقّ طبولي
٢/٩ عماد فجر بعريني
