على دلعونه وعلى دلعونه
بتبقى سوريا علينا حنونا
وعلى دلعونه وعلى دلعونه
حكومتنا هاجت وجنّ جنونا
حموده بيقول الحاله مليحا
وعندو زعران وعندو شبيحه
والسوري بسوريا صار أسمو دبيحه
سرقونا وبالعماله أتهمونا
وبالطابور الخامس بيهددونا
لا تقول أمريكا ولا تقول إرهابي
ولا تهددوني بتطيير حسابي
خايف شي مره افقد أعصابي
وأكفر بالربّ وأبنو آمونا
وإذ بصرخ مره من قهري وجوعي
وعا حظ ولادي نزلت دموعي
البعثيي بيقولو عني شيوعي
والناس المنقاده بيحاصرونا
وبيجيبو مشايخ بيكفرّونا
وإذ أحتجينا على التسعيره
لحكومه دغري بترخي عراعيرا
وبيصير الفقير حقو كم ليره
وكم علبة حمّص مع معكرونا
السوري ببلادو محروم من كلشي
صرنا نترّحم عا شيخ المحشي
وأبن المسؤول بيلهط وبيمشي
وبعيد ميلادو بدّو مادونا
وما بيقبل إلا دينا الرقاصه
وحفله عا كيفو بالشيراتون َ
قاعد ببلادي وفشرتو سافر
لو جبتو عليي كلّ المخافر
بلادي خيراتا من عمرو وافر
ونص السوريي صارو مديونا
حكومه ما شفنا متلا بزماني
بتمشي عا كيفا علينا فلتانه
فقدت أخلاقا وحسّا الإنساني
ومشيت عرياني وباعت كلسونا
٢/٤ عماد فجر بعريني
