زجل الجزء الاول
بدّي أكتب قرّادي
وحطّا تذكار
بلكي ها الناس بتوعى
وما بيبقى حمار
هاي دقني وبكرا قولو
قال ها الختيار
يلّي ايدو بالميي
مو متل النار
صارت الدنيا فوضى
وخفّ الوجدان
وبالحيونه البني أدم
سبق الحيوان
صار بيسرق وبيزني
بأسم الايمان
متل الثعلب بالغابه وطبعو مكّار
ويلو يلّي بها الزمن
الناس بيحتاج
والله يعين اللي دارو
ما عليها سياج
بيطلعلو فرقة سرقه
وابن الوهّاج
ورزقو بيروح قبالو من قلب الدار
والمسكين اللي معتر
مغضوب عليه
كلّو بيصير يعضّو
وبيعوي عليه
واللي احوالو مليحه
وعندو شاليه
من الجوعان اللي متلي صاير بيغار
وكلّو يا نور عيوني
عايش محكوم
ما عاد الناس يهمّا صرخة مظلوم
واللي بيقعد عا كرسي
ما عاد بيقوم
ناسي أنو عا الدنيا جينا زوّار
نهاية الجزء الاول
٧/١٧
عماد فجر بعريني
زجل
الجزء التاني
بدّي ابعت برقيه
وابعت إخبار
لرئيس الجمهوريه
الدكتور بشار
ببلادي ما فيه سرّ
ولا فيه أسرار
المرفأ صاير لتلاته
ومتلو المطار
والريجه وعين الفيجه والمليارات
بيروح سمسار من عنا
بيرجع سمسار
واللي حارب واستشهد
جاعو ولادو
ودمو صاير رصيد ببنك التجار
واللي بيدخل عا المشفى
من إلتهاب
كلو بدو يتجبّر حتى البواب
بتقول داعش موجوده
بيقصّو رقاب
والتسعيره معروفه حقو دولار
كترو الشبيحه عنا
ما بعرف ليش
مع حموده باروده
ومعاه عليش
إن جابت أمو غنمه
لقّم رشارش
وبيسحب فردو عن خصرو وبيطلق نار
وبدّي كمل مشواري
بأسم المحروم
واعدام الفاسد واجب
بدو مرسوم
السوري من يوم يومو
عايش مظلوم
واحيانا بدو يضارب الله بحجار
الليله حلمت وبحلمي
شايف إبليس
نازل عا الشعب السوري
بصورة قديس
خمسه وخميسه تحميه
طلع خميس
والليره السوريه عنا بلشت تنهار
٧/١٨
عماد فجر بعريني
