الليله بدّي أشرب كاس
وبدي اكشف المستور
عنّا شيخ بضيعتنا
عيمل عا العالم دكتور
بيّو محطوط بقبّه
وعلى جدّو نزل النور
لما اللي بيقعد بينخّ
بياكل بالوجبه ساعور
يوميّه عندو زوّار
من صافيتا ومن يحمور
وعندو لجنه أمنيّه
خصوصي لا تنظيم الدور
عندو كتيبه للغدّه
وعندو كتيبه للباسور
وبيشفي أمراض الثدي
عا ذمة جارتنا بدور
بحبل النسوان مختصّ
عيونو متل عيون اللصّ
طولو بيطلع متر ونصّ
وبيقفز متل العرعور
لسعاتو سمّاويّه
وبيلدغ متل الدبور
يوميّه بشوفو معزوم
ما ترك عياد ولا ندور
تلات عياد بحارتنا
وخمسه بحارة بيت عمور
وقبل ما يروح عا بيتو
بياكل حسنة بيت جبور
ياما كان يلحس صحون
بوقعة حافظ جبور
مع لحمة ضانه وفريك
وعيران وخبز تنور
وكان يمشي خلفو شلّه
ويوميّه بيجمع غلّه
للحصّه بيحمل سلّه
وواحد حامللو بخور
الحقيقه يا شيخ منصور
انا من امثالك مقهور
يا حيف ويا عيب الشوم
نعيش العمر شهود زور
٣/١٦ عماد فجر بعريني
