pênûsa Imran Yûsiv
Gulek sor
Baranek hûr
Xezalek bi nazî
li baxê min bigere
Besin ji bo
tabloyek ji eşqê bête afirandin
-----------
Evîna te
Tabloyeke suryalî ye
Birêveçûneke seyr e
metisîdar e
Awazeke nepenî ye
Evîna te
Çîrokeke helbestî ye
Bê destpêk, orte û dawî ye
Xweşî û nexweşî ye
Evîna te
Bê ser û ber e...bê navnîşan e
Êşeke sermedî ye
------------------
Tu nêzî min î
Bi qasî deşt û deryayan
Bi qasî stêr , ewr û çiyayan
Ez bêhna te dikim
Henasiyên te dibhîzim
Nexşeya laşê te jiber dikim
Her kêliyekê
Te di himbêza xwe de dibînim
te didim hev
Û te ji hev dixînim
------------
Dibe ku rojekê
Li deverekê em pêrgî hev bibin
Yan nişkaveyek
Me li gel hev bicivîne
Wê gavê
Axaftin ne gerek e
Tenê helbest wê ji me re bibe talde
------------
Dûr neçe
Ditirsim hest qeşayê bigrin
Û tenahî min bixapîne
Ditirsim
Zeriyek dil germ
Min ji te bistîne
-----------
Pênûsa min
Rêwiyeke şeyda ye
Xwas û tazî
Li valahiyeke spî ..xwe radikşîne
Li şûna gavên xwe..Awazan diçîne
Geh bi mijankan ve heldiperike
Geh xwe di reşka çavan de werdike
Bi awirên te yên pîroz xwe dişo
Diêşe..diweste..
winda dibe....tî dimîne
Ber bi lêvên te gavan tavêje
Dilezîne
Li ser wan koça xwe datîne
Kêliyekê bêhina xwe vedide
Hin şîravê vedixwe
Serxweş dibe...
Hin maç û ramûsanan
Di tûrikê xwe de hiltîne
Ber bi jêr ve diçe
Bi gerdena te re dadikeve
Bi cotê memkê te ve hildikşe
Pênûsa min
Li hevrazên te
xweşiya bê hempa.. Dibîne
-----------
!?... te çi me
!?... te kî me
Bê te helbestek sêwî me
Kesek tine min bixwîne
Bê te peyvek bê wate me
Di ti ferhengan de nîne
Bê te ewrek bê baran im
Stêrek şevê bê ronî me
Bê te ez pêtek bê ar im
Bê te êş im ..bê te jarim
Ewarim bê cî û war im
Bê te çi me....bê te kî me
Bê te nînim
Bê te ......darek bê zemîn im
-------------
Şevek din derbas dibe
Dûrahî min dixapîne
Dem xwe dubare dike
Bêrîkirin min diêşîne
Dildarim gelo ! Yan xewndarekim
Destan li mijê dipelîne
Ez nema dizanim
Derewe ev....yan...evîneke dîne
-------------
Dixwazim
Bi tîrêjên rokê
Porê te bişkinim
Da ku roja min geştir bibe
Roja we bi xêr û xweşî be
----------------------
Şeva bûrî
Nizanim..Ez li wir bûm
Ne tu li vir bû
Deverek ne wek hemû deveran bû
Ne zemîn bû, ne ezman û ewr bû
Stêr, gul, keskesor....
ji me re doşek bû
Hawîrdor mûm , fener, çira û find bû
Şeva bûrî
Tu .....li gel min bû...
Û yê mayî tevde xewn bû
Erê ....erê.................xewn bû
-----------
Tu dizanî çima
Helbestan diyrî te dikim !?
Helbest naçilmisin
Kevin nabin...narizin
Û eger rojekê
Te ji dil koç kir
Tu nikarî helbestên min
bi xwe re bibî
Helbestên min li min vedgerin
-------------
Keçê dînê
Her kêliyekê
Xwe bîne bîra min
Da ku peyv
Ji malzaroka helbestê
Biherikin
------------
Hevalşeva min
Li gel te
Xew geşteke seyr e
Birêveçûneke dûr e
Wesstan û bêhinvedan e
Hevalşeva min
Ji bilî te
Kes xweziyên min serxweş nake
Êşên min derman nake
Kes agirê bêrîkirinê venamrîne
Û Xwestekên min haş nake
Ji bilî te...
Kes bêhina min fireh nake
Hevalşeva min
Çendî tu rind î
Çendî tu merd î....bedew û boz î
Tu tûrikê razeyên min î
Çendî tu ....dilsoz î
------------
Li berava dil
Xwe li ba ke
Bila hechecîkên min
Li dora bejna te bifirin
Wan bi ciwaniya xwe şa ke
Dilê min derya ye
Tu jî perî yî
De zû ....
Bi hemû naziya xwe
Xwe tê werke
Bila pêlên dîn laşê te bimijin
li binya dil bi cî bibe
Min bi xwe re
di nav xweşyê de windake
----------
Êvarekê
Bi sura bayê zivistanê re were
Serma tenahiya min bişkîne
Cotê memkên xwe
li tiliyên min ...bigerîne
Porê xwe bi ser min dake
Weke zarokekî ber şîr
Li ser sînga xwe....min razîne
Were
Bi ewrên zivistanê re.... were
Bibe berf û baran...
Bibe bagerek....
Bibe bahozek......
Min li ber xwe bibe
Min ji êşê rizgar bike...min birevîne
-------------
Min di çavên xwe de hilîne
Şevên zivistanê dirêj in
Tenahî sar e
Min di bîra xwe de bîne
Dûrahî pûk e, bahoz e
Bêrîkirin dijwar e
------------
Bi qasî dûrahiya
di nav me de
Tu nêzîkî min î
Berê xwe bi ku ve dikim
te dibînim
--------------
Şirşira baranê
Dengê kenê te ye
Tenahiya min şil dike
Û xeman ji dilê min
direvîne
--------
Keçê dînê
Bi ser min de bibare
Weke baraneke dîn
Bila laşê min têr te vexwe
Û bila bêhna te ji min were
An jî
Bibe lehî
û min li ber xwe bibe
--------
Pêdiviya min
Bi dengê te heye
Da ku bikim bilûrek
li ber awazên wê
Keziyên Helbestên xwe yên mayî
bihûnim.
---------
Tê bîra te....?
Şeveke havînê bû
Min stêr ji te re diçinîn
Te jî ji min re distra
Te got...
Ezê stêrên te ji xwe re
bikim gerdenî
Min got....
Ezê dengê te yî naz
Bikim berbejn
û ... bi sînga dilê xwe vekim
Tê bîra min.....
-------------
